Robert Fludd-entzat
1995-96Emultsioa, akrilikoa eta ekilore haziak xilografian argazki collage gainean105 x 82,5 x 105 cm, 16 orrialde bikoitz
Bigarren Mundu Gerrako azken gudua gertatu baino hil batzuk lehenago Alemanian jaio zela, Anselm Kiefer gerra modernoaren ondorioen eta bere herrialdearen banaketaren lekuko hazi zen. Gainera, nazio zatikatu bat nola berreraiki zen eta haren berritzeko ahalegina bizi izan zuen. Kieferrek elkarri lotutako Alemaniako historiaren eta mitologiaren ereduak eta horiek faxismoa agerrarazten nola lagundu zuten ikertzeari heldu zion. Gai horiek tabu estetikoak urratuz eta ikono sublimatuak berpiztuz landu zituen. Bere lehenengo proiektuetako batean 1969ko Okupazioak (Occupations) saila, Kieferrek Suitza, Frantzia eta Italian zehar egindako bidaia batean, hainbat tokitan, argazkiak atera zizkion bere buruari, nazien agurra egiten zuela. Geroagoko margolanek paisaia erraldoiak eta arkitektura-barnealdeak agertzen dituzte eta harea eta lastoa aplikatu ohi zizkien; Alemaniako politika eta literaturaren ondarea gogora ekartzen dute. Ugari dira nibelungoen kondairei, Richard Wagner-i, Albert Speer-en arkitekturari eta Adolf Hitler-i erreferentziak. 1980ko hamarkadako erdialdetik eta, zehazki, 1990eko hamarkadaren hasieran Frantzia hegoaldera lekualdatu ondoren, Kieferrek bere ikonografia handitu zuen, eta gai unibertsalagoei heldu zien, adibidez: zibilizazioa, kultura eta espiritualtasuna; horretarako, inspirazio-iturri gisa hartu zituen Kabala, alkimia eta Antzinateko mitologia.
Artista-liburuak 1968tik Kieferren adierazpide nagusienetako bat izan dira. Artista-liburu asko ez bezala —sailean ekoizten dira—, Kieferren liburuak ale bereziak dira, artisau-lanak, eta, ondorioz, margolanetatik edo eskulturetatik hurbilago daude. Lan hau, Robert Fludd-entzat (Für Robert Fludd, 1995-96), Robert Fludd (1574-1637) filosofo metafisiko eta alkimista ingelesaren omenez egin zuen. Filosofoaren ustez, unibertsoko elementu bakoitzaren funtsa gizakian aurki dezakegu, eta ideia horren arabera, badago unibertsoko askotariko eremuen arteko orden kosmologiko bat. Fludd ezaguna zen, halaber, bere ideia filosofikoak eta kosmologikoak, garaiko grabatzaile onenen laguntzaz, grafikoki azaltzen zituelako.
Kiefer 1990eko hamarkadaren hasieran Fludd gai zuten liburuak eta margolanak egiten hasi zen. Liburu honek argazki-sorta bat biltzen du eta horien bidez, ekilore-soro baten hazkundea irudikatzen du. Kieferrek analogia bate gin eta harentzat, ekiloreak Fludden pentsamendua adierazten dute, hots, mikrokosmosaren eta makrokosmosaren arteko harremana badagoela; izan ere, sinbolo horixe erabili zuen Ekiloreak (Tournesols, 1996) lanean. Liburuaren portadak ekilore baten zuri-beltzezko argazki bat erakusten du. Barnealdean, berriz, argazkiek hazten, heltzen eta haziak askatzen ari diren ekiloreen irudiak erakusten dituzte; gainera, Kieferrek benetako ekilore-hazien bidez adierazi ditu aleak, collagean gisa itsatsi ditu orrialdeen gainean. Ekiloreak zimeldu eta galdu egiten dira, eta haziak baizik ez dira geratzen. Hurrengo orrialdean, zeru izartsu baten irudiak ordezkatzen ditu sakabanatutako haziak.
Iturriak:
Nancy Spector: "Anselm Kiefer", in Spector (arg.), Guggenheim Museum Collection: A to Z, 3. argt., Solomon R. Guggenheim Museum, New York, 2009.
Miguel López-Remiro: "Anselm Kiefer", in Colección del Museo Guggenheim Bilbao, Guggenheim Bilbao Museoa, Bilbo; TF Editores, Madril, 2009.
"Anselm Kiefer", in La Colección Permanente de los Museos Guggenheim, Guggenheim Bilbao Museoa, Bilbo, 2007.
Jatorrizko izenburua
Für Robert Fludd
Data
1995-96
Teknika / Materialak
Emultsioa, akrilikoa eta ekilore haziak xilografian argazki collage gainean
Neurriak
105 x 82,5 x 105 cm, 16 orrialde bikoitz
Kreditua
Guggenheim Bilbao Museoa
