Arte liluragarria familientzat

303. gela, hirugarren solairua

Gilbert & George artistentzat, existitzen den guztia gai bihur daiteke obra egiteko; adibidez, inspirazioa aurkituko dute pertsonengan, basamortuan, oihanean edo hirietan.

Ekoizpenean erabiltzen dituzten ia irudi guztiak ingurune hurbilenean aurkitzen dituzte, etxetik gertu. Era horretan, obraren zati handiena East End auzoan inspiratzen da —Londresko auzo bat; beraiek han bizi dira eta han lan egiten dute aspalditik— eta bertan bizi diren pertsonengan; esate baterako, obra honetan ateratzen diren gazteak!

Gilbertek & Georgek elkar ezagutu zutenean, elkarrekin lan egiten eta bizitzen hasi ziren, eta haien identitate artistikoak batean urtu zituzten. Beren buruak “eskultura biziduntzat” hartzen dituzte, eta uste dute egunero egiten duten guztia ere artelana dela, antzezpen bat bezala.

Ohartu al zara obra honen erdian agertzen direla? Zure ustez, zergatik erretratatzen dira horrela artistak?

303. gela, hirugarren solairua

Gela honetan bertan aurkituko duzu Jeff Koons artista estatubatuarraren Idi-bihotzak obra. Jeff Koonsen Idi-bihotzak koloretako ispiluen antzekoak dira, eta horietan batak bere buruari begiratu eta beste kolore batekoa ikus dezake bere burura. Gainera, inguruan dagoena islatu eta kolorez aldatzen dute. Kartoi mehe distiratsu edo metalizatuekin forma ezberdinak sor daitezke.

Ondo begiratu… Idi-bihotzak iruditzen zaizkizu? Usaina dutela uste duzu? Horrelakoak bezain idi-bihotz handiak existitzen dira? Eta hain distiratsuak, kolore hain bizikoak? Zuk noizbait horrelako lorerik ikusi al duzu?

Jeff Koonsek gustuko du eguneroko errealitatetik gauzak hartzea eta bere erara eraldatzea, baita eskala aldatu eta direnak baino handiagoak egitea ere.

Horrez gain, artistak altzairu herdoilgaitza eta kolore biziak eta oso distiratsuak erabili zituen eskultura egiteko. Badirudi lore horiek ez dutela ezer pisatzen, baina horiek fabrikatzea oso zaila izan da materiala oso astuna erabiltzeagatik eta hainbeste kalkulu eta proba egin behar izateagatik. Beraz, lorpen handia egin du artistak!

Lore hauek jostailu handi batzuek bezalakoak dira, haurren edozein amets, egi bilakatua. Jeff Koonsen obraren zati handi batek izpiritu jostaria eta isekaria du. Artistaren ustez, gauza interesgarriak konta daitezke itxura erraz eta dibertigarriaren bidez.

Imajinatzen duzu eguneroko objektu batzuk nola aldatuko liratekeen handiagoak izango balira, edo kolore biziagoak izango balituzte, edo beste material batekin eraikiko balituzte?

303. gelaren alboko korridorea

Zer sentitzen duzu artelan bat ikustean? Ez galdu ARTETIK: From the Art! esperientzia digitala

Museoaren Bilduman gehien gustatzen zaizun obra edo nahi duzuna aukera ezazu; hautatu sortzen dizun emozioa eta emaitza ikusiko duzu. Liluragarria!

Sentitu artea Museoaren Bildumarekin eta partekatu zure emozioak! Halaber, behatzen dituztenen artean lilura sortzen duten beste obra batzuk ere ezagutu ditzakezu.

Proiektu hau Guggenheim Bilbao Museoaren eta Google Arts & Culture-ren arteko lankidetza da.

Museoko plaza

Museoko plazan Jeff Koons artistaren Puppy obra aurkituko duzu.

Hori txakurra al da? Hain handia? Imajina itzazu gehien gustatzen zaizkizun animaliak baina beste tamaina batean! Puppy Museoaren txakur zaindaria bezalakoa da, zaintzen eta babesten duena, sartzean ongietorria egin eta irtetean agur esaten diguna.

Koonsek bere lanetan umorea ez ezik, material oso originalak ere erabiltzen ditu horiek egiteko. Konturatu al zara Puppy zer-nolako materialez egina dagoen?… Loreak!

Artistak lorez, zuhaitzez, iturriz eta eskulturez beteta zeuden jauregi handien inguruko lorategi handiak izan ditu inspirazio-iturri. Batzuetan, gorma geometrikoak eta labirintoak sartu izan ditu, zuhaitzekin eta moztutako heskaiekin eginak. Siluetaz betetako leku horiek buruan izanik, Koonsek txakur itxurako lorategi bat sortu zuen.

Gainera, Puppy ez da beste eskultura batzuek bezalakoa: bizirik dagoen artelana da, egunero aldatzen dena, loreak hazten diren izaki bizidunak izateagatik, eta zaindu eta mimatu egin behar da.