Konposizioa, 1922

László Moholy-Nagy hungariar jatorriko artistaren bizitza eta nortasuna etengabeko migrazioaren esperientziak markatuta egon ziren, joan-etorriek eta behin eta berriz hutsetik hasi beharrak markatuta. Lehen Mundu Gerran zauritu egin zuten, eta eriondoan zehar hasi zen marrazten. 1919an Vienara emigratu zuen lehenik, eta Berlinera gero; han egin zuen lehen erakusketa, Sturm galerian, eta konstruktibismoaren zenbait ordezkari ezagutu zituen bertan. 1923an, Walter Gropiusek Bauhauseko metal-tailerraren zuzendari izatea proposatu zion, eta, irakasle gisa lan egiteaz gainera, diseinu grafiko eta tipografikoen artxibo bat sortu zuen bertan. Garai hartan, konposizio geometriko askorekin esperimentatu zuen, eta horren erakusgarri da linografia hau, 1924ko martxoan Der Sturm aldizkariaren lehen zenbakian argitaratua. Bertan, hondo beltz zehaztugabe batean flotatzen bezala ageri dira zenbait irudi geometriko. Linografiek eta xilografiek berebiziko garrantzia zuten Bauhausen kultura plastikoan, eskuragarriak eta erreproduzitzen errazak baitziren, eta bizkor zabaltzeko modukoak.