Didaktika proiektuaren baitan, Museoak hezkuntza-jarduerak eta -eremuak diseinatzen ditu, erakusketen osagarri gisa, eta jarduera eta eremu horiek tresna ugari eskaintzen dituzte, bai erakusketa-aretoetan, bai online, jendeak hobeto uler ditzan artistak eta haien lanak.

XX. mende hasieran, giza burmuinari buruzko ikerketek aurrera egin zuten. Alemanian, Korbinian Brodmann neurologoa (1868–1918) buru zuen praxiak burmuin-geruzako 52 area funtzional identifikatu zituen. Ameriketako Estatu Batuetan, Harvey Williams Cushing (1869–1939) neurokirurgiaren aurrendaria izan zen. Aurrekari izan zuen Santiago Ramón y Cajal espainiarra (1852–1934), Medikuntzako Nobel Sariduna 1906an. Nerbio-sistema zentral eta periferikoa ezagutzeko hark egindako ekarpenek neuroanatomia modernoaren aitzindari bihurtu zuten.

Aldi berean, arrazoiaren ahalmena eta errealitate ukigarria zalantzan jartzen zituzten planteamenduak sortu ziren. Sigmund Freud (1856–1939), psikoanalisiaren asmatzailea, subkontzientearen azalpena ematen saiatu zen XX. mende hasieratik. Psikeari buruzko azterlan ugari loratu
ziren garai hartan.

Berrikuntza zientifiko guztien artetik, Alexander Flemingek (1881–1955) 1928an egindako aurkikuntza nabarmendu behar da: penizilina. Gertaera horrek baikortasuna piztu zuen pandemiek astintzen zuten gizartean; horietako bat izan zen, esaterako, 1918–19ko “gripe espainiarra”, zeinak mundu osoko milioika pertsona hil baitzituen. Antzeman dezakezu antzekotasunik bizi dugun orainaldi honekin?

Kirurgia-irakasleak ebakuntza egiten duen bitartean ikasleek pantailan zuzenean jarrai dezakete irudi- eta soinu-sistemari esker. Azala : Le Petit Journal —Illustré—, 1924. Argazkia: Leemage. Getty Images.