Bi emakume elkar besarkatzen, 1915
1915. urtea garrantzi handiko mugarria izan zen Schieleren bizitzan: ordura arte bikotekide izandako emakumearengandik banandu, eta Edith Harmsekin ezkondu zen, familia aberats bateko alaba gaztearekin. Maitemin erromantiko haren bat-bateko loraldiak eragin nabarmena izan zuen Schieleren artean. Lesbianismoa ez zen gai berria haren obran, eta mende aldaketako Vienako artearen bereizgarrietako bat zen, oro har, sexualitatearen adierazpen oro askatasunez irudikatzea. Gai horiek garai hartako argazkilaritza artistikoan ere lantzen ziren, eta Schielek berak ere esperimentatu zuen bitarteko horrekin: argazkilaritzaren eragina nabaria da ezohiko angelu goratu batetik erretratatutako bikote baten eszena honetan.