Marrazten ikasten. Marraztu istorioak kontatzeko (Larunbatak)

Hiruhileko honetan istorioak modu bisualean kontatuko ditugu marrazkien bitartez. Marrazteak zure ingurura eta zure barruan ere arretaz begiratzeko aukera ematen du. Jakin-minez begiratzera gonbidatzen zaitugu eta, ondoren, modu grafikoan zer kontatu nahi duzun aukeratzera.

Tailer horietan, sekuentzia (mugimendua, jarraitutasuna, erritmoa…), pertsonaien diseinua (emozioen adierazpena, keinuak, aurpegiak) edo testuaren eta irudiaren arteko harremana (binetak, bunbuiloak, onomatopeiak) bezalako gaiak jorratuko ditugu, kontatu nahi dugun istorioa marrazteko: amets bat, etorkizunean gertatzea gustatuko litzaigukeen zerbait, …. Gure sorkuntzan, inspirazioa behar dugu, eta Museoa hori bilatzeko leku aproposa izan daiteke. Tarsila do Amaralen erakusketak eta Budapesteko paper gaineko maisulanak izango dira gure lantokia saio batzuetan.

Ikastaroan zehar, hainbat teknika erabiliko dira; esate baterako, ikatz-ziria, akuarela edo errotuladoreak, eta margotzeko hainbat euskarrirekin esperimentatuko da. Gainera, liburu txiki edo aldizkari ilustratu bat egingo dugu ikastaroaren prozesua dokumentatzeko.

Hezkuntza-proposamen honetan, ikasturte osoan zehar tailer progresibo batzuk egingo dira, teknikak eta kontzeptuak ikasteko, arteaz egitetik gozatzen den bitartean; era horretan, arteari beste begirada bat emango diogu, aktiboagoa eta hurbilagoa.

Hirugarren zatia: 6 tailer (martxoaren 29tik maiatzaren 17ra)

Martxoak 29: Marrazkiekin kontatu
Narrazio grafikoaren sarrera honetan, irudi-sekuentzia baten bidez istorio bat kontatzeko modu desberdinak ikasiko ditugu.

Apirilak 5: Pertsonaien diseinua
Pertsonaiak sortzen hasiko gara, eta horiei bizia eta nortasuna emateko keinuak eta emozioak nola irudikatu aztertuko dugu, eta jantziak aukeratuko ditugu.

Apirilak 12: BOOM!
Testuaren eta irudiaren arteko harreman-aukera desberdinak ezagutuko ditugu, bunbuiloak, onomatopeiak eta tipografia desberdinak erabiliz.

Maiatzak 3: Marrazki bizidunak
Gure marrazkien animazio laburra egingo dugu folioskopioaren teknikarekin, mugimenduaren ilusioa sortu ahal izateko.

Maiatzak 10: Aurpegiak eta figurak
Forma geometrikoak, lerro zuzenak eta trikimailuren bat edo beste erabiliko ditugu pertsonen eta figuren erretratuak marrazteko, jarrera eta espresio desberdinak landuz.

Maiatzak 17: Ez dagoena marraztea
Amets bat, gertaera arraro bat, etorkizunerako desio bat… marraztuko dugu. Eta gure marrazkiak eta istorioak gure esperientzia laburbilduko duen aldizkari edo argitalpen kolektibo batean jasoko dugu.

Saioaren gidariak: Monica Martinez, Raul Dominguez Pazo

Larunbatak, 17:30
Adina: 6–10 urte
Iraupena: 90 min.
Hizkuntza: gaztelania
Plaza-kopurua mugatua da