Zazpi puntako izarra (1908)

Zazpi puntako izarra multzoaz ari zelarik, Af Klintek adierazi zuen bere gidari espiritualek agindu ziotela zazpi koadroko hiru talde margotzeko, bakoitza zazpi eguneko epean. Jarraibide horiek gorabehera, bere sormena nahieran erabiltzeko askatasuna zeukan. Lerroaren erabilerak marrazki automatikoena gogorarazten du, baina kontrolatuago dago hemen. Forma eta kolore dotoreki sinplifikatuekin, obra hauek abstrakzio modernoaren funtsezko alderdi batzuk iragartzen dituzte, hurrengo hamarkadan hobeto zehaztu zirenak. Hala ere, Af Klint ez zen inoiz kontu formaletan bakarrik zentratu.

Artistak erreferentzia ugari txertatzen zituen bere lanean, esanahi desberdin askotakoak. Hala, zazpi puntako izarra —hain zuzen, irudi horrek ematen die izena margolan hauei eta Eboluzioa izeneko multzoarekin batera osatzen duten sailari— sinbolo bat da zenbait tradizio erlijioso eta okultistatan. Kristautasunean, Kreazioaren zazpi egunak irudikatzen ditu; judaismo kabalistikoan, bizitzaren zuhaitzaren zazpigarren esfera irudikatzen du; islamean, Koranaren lehen zazpi txatalei egiten die erreferentzia; alkimian, eguzki-sistemako zazpi planeta klasikoei; eta jainkozko perfekzioarekin eta beste hainbat kontu sakraturekin lotzen da, bai antzinako sinesmenetan, bai egungoetan. Teosofiak zazpi izpien kontzeptuan —geroago Naturaren zazpi printzipioak deituak— bildu zituen ideia horiek guztiak.