Kosmo jaio da, Museoaren Bildumaren ezagutza-grafoa

Guggenheim Bilbao Museoak tresna digital berritzaile bat aurkeztu du bere Bildumako artistak modu interaktiboan ezagutu ahal izateko

Guggenheim Bilbao Museoak tresna birtual berri bat aurkeztu du, bere Bilduman ordezkatutako artistak modu dinamiko eta bisualean lotzen dituena. Kosmo izeneko esperientzia digital horrek kontsultarako aukera zabala eskaintzen du interfaze intuitibo baten bidez, eta esplorazio-eta aurkikuntza-ibilbide desberdinak sortzea nahiz esperientzia birtual paregabea eraikitzea ahalbidetzen du. Erreminta gaurtik aurrera egongo da eskuragarri Museoaren webgunean.

Guggenheim Bilbao Museoak arte modernoa eta garaikidea ezagutarazteko eta haren gozamena sustatzeko hartua duen konpromisotik sortua, esperientzia horren abiapuntua artisten konstelazio bat da, eta bertan ageri diren elkarguneek haien arteko loturak erakusten dituzte. Artisten irudien gainean klik eginez, hainbat baliabide zabaltzen dira, eta aukera ematen dute sakonetik ezagutzeko haien biografiak, artelanak eta Museoan ikusgai egon diren erakusketak, bibliografiak, haiekin zerikusia duten Bildumako gainerako artistak, baita bideoak eta dokumentalak ere, haien sorkuntza-lengoaiak are gehiago hurbiltzen dizkigutenak. Hortik aurrera, eta iragazki batzuen bidez, korronte edo mugimendu artistiko zehatzen arabera, lantzen dituzten adierazpideen arabera edo beren jaiotza-hamarkaden arabera taldekatu daitezke. Gainera, artista horietatik bertokoak edo estatukoak zeintzuk diren jakiteko aukera ematen du, baita iraunkorki ikusgai dauden obrak zeintzuk diren jakitekoa ere.

KOSMO AZTERTU

FAQ

Nola lortu dezaket baimena Guggenheim Bilbao Museoaren barrualdean nahiz kanpoaldean argazkiak ateratzeko edo filmatzeko?

Bidali mezu bat xehetasun guztiekin helbide honetara: media@guggenheim-bilbao.eus

Mezuan informazio hau jarriko da: grabazio-mota, eguna, ordua eta iraupena, zein den grabazioaren helburua (eraikina, erakusketak), elkarrizketa behar duen edo bestelako informazio interesgarria.

Behin eskaera onartuta, Museoak taldea osatzen duten kide guztiei buruzko datuak jasoko ditu, filmazioa egin aurretik.

Ikus-entzunezko produkzioetan Museoaren irudia erabiltzeak tarifa bat izan dezake. Eskaera bakoitza Irudi Batzordeak aztertuko du. Eskaera baten berrikuspena 3 egun baliodunetik 2 astera arte luza daiteke. Saioak aldez aurretik planifikatzea gomendatzen dugu.

Nola lor ditzaket erakusketen eta eraikinaren irudiak komunikabide batean argitaratzeko?

Irudiak lortzeko, sar zaitez hemen eta deskargatu materiala. Premiazko eskaeretarako, posta elektronikoaren bidez edo telefonoz jar zaitezke harremanetan.

Irudiak beren egilearen izenarekin erreproduzitu behar dira, distortsionatu, mutilatu edo aldatu gabe. Irudi horiei beste erabileraren bat eman behar bazaie, Museoaren berariazko baimen idatzia beharko da.

Nola lor dezaket erakusketa zehatz baten press kit bat?

Informazio guztia web orrialdeko Prentsa sailean eskura daiteke, erakusketen atalean.

Nola lor dezaket prentsa-baimen bat?

Prentsa-txartela aurkeztu behar baduzu Museoko leihatiletan, sarrera doan eskuratuko duzu. Kontuan izan kazetariei Museoa doan bisitatzeko aukera ematen zaiela, museoaren jarduerei, ekitaldiei eta erakusketei publizitatea ematearen truke.

Nola jaso dezaket Museoaren erakusketei eta gaurkotasunari buruzko informazioa?

Bidali mezu bat hedabideari eta kazetariari buruzko informazio osoarekin media@guggenheim-bilbao.eus helbidera.