Bill Viola: denborazkotasuna eta transzendentzia

Bill Viola aintzindaria da bideoa erabiltzen, 1970ko hamarkadatik dihardu baliabide horretan lanean; mugimenduzko irudia sormen-lan monokanal, instalazio eta bestelako obra batzuen bidez aztertu du, artearen historiarekin, espiritualtasunarekin eta kontzeptuarekin eta pertzepzioarekin zerikusia duten beste gai batzuekin duen lotura estua islatuz. Bill Viola: denborazkotasuna eta transzendentzia erakusketa artista honen lanaren gaikako azterketa bat izan zen, eta erakusketa ireki aurreko urteetan egindako instalazio adierazgarrienak bildu zituen: Egunero aurrera eginez (Going Forth by Day, 2002) eta Bost aingeru milurtekorako (Five Angels for the Millennium, 2001).

Solomon R. Guggenheim Museum-ek eta Deustche Guggenheim Berlin-ek batera eskatu zioten artistari Egunero aurrera eginez egitea. Bost zatitan banatutako zikloa da, proiektatutako irudi digitalena. Lan horretan, Violak fresko pintura hartu zuen erreferentziatzat, jaiotzaren, heriotzaren eta berriz jaiotzearen zikloak aztertzen dituen ahalmen handiko instalazioa sortzeko. Pieza bakoitzak —instalatzen den espazioko paretaren gaineko proiekzio bat— 35 minutu irauten du gutxi gorabehera eta goi-mailako definiziozko bideoaren teknologia punta-puntakoena erabiliz grabatuta dago. Obra esperientzia arkitektoniko gisa ulertzen da, eta osatzen duten irudien bost sekuentziak aldi berean proiektatzen dira areto bakar batean. Instalazioak hartzen duen espaziora heltzeko, bisitariak lehenengo irudiaren argian sartzen dira literalki. Barruan daudela, irudi eta soinuen unibertsoaren erdian ezartzen dira, inguratzen dituzten pareta guztietan proiekzioak eskaintzen baitzaizkie.