ESKALA, BESTE MAILA BATEAN

Jackson Pollock
Horma irudia (Mural), 1943
Olio-pintura eta kaseina mihise gainean
243,2 x 603,2 cm
The University of Iowa Museum of Art. Honen dohaintza: Peggy Guggenheim, 1959.6
© The Pollock-Krasner Foundation, VEGAP, Bilbo, 2016

Eskala da Espresionismo Abstraktuaren nortasunaren bereizgarria. Artista batzuei New Deal programako Federal Art Project proiektuan horma-pinturak egiteko esperientziak eragin zien, eta asko, gero, ikusleak ia irensten zituzten mihise erraldoiak egiten hasi ziren. Arte espresionista abstraktuak artistak eta ikusleak topo egitea eragiten du: artistak emozioak adierazten ditu eta obran bertan dagoelako sentsazioa ematen du, eta ikuslearen pertzepzioa obraren azken osagaia da. Pollockek 1950ean esan zuen pintura abstraktuak ikusleari “aurre egiten” diola. Houstongo Rothko kaperak nabarmentzen duen legez, obra erakusteko moduak topaketa horren bizitasuna indartu dezake.